Жорий йилнинг 19 февралидан «Chess24.com» сайти орқали ўтказиладиган “MeltwaterChampionsChessTour” онлайн турнирлари доирасидаги илк мусобақа “AirthingsMasters” баҳсида ҳамюртимиз, рапид йўналиши бўйича энг ёш жаҳон чемпиони Нодирбек Абдусатторов қатнашади.
Мукофот жамғармаси 150 минг доллар этиб белгиланган турнир рапид йўналишида ўтказилади. Унда иштирокчилар дастлаб 15 турдан иборат саралаш босқичида куч синашади.
Шахматчилар тўплаган ҳар бир очкоси учун 250 доллардан мукофотга эга бўлишади. Саралаш босқичи якунига кўра, энг яхши натижа қайд этган 8 нафар шахматчи плей-офф босқичида ғолиблик учун кураш олиб боради.
Қуръа натижасига кўра, саралаш баҳсларида Нодирбек Абдусатторов 1-турда нидерландиялик Аниш Гири билан куч синашса, иккинчи раундда жаҳон чемпиони, ушбу турнирнинг амалдаги ғолиби Магнус Карлсенга қарши дона суради.
Саралаш босқич бахсларида Абдусатторовга Ян Непомняший (Россия), аёллар ўртасида 12-жаҳон чемпиони Александра Костенюк (Россия), дунё рейтинги пешқадамларидан Дин Лижен (Хитой), Ян Кшиштоф Дуда (Польша), Левон Аронян (Арманистон), Шаҳриёр Мамадиёров (Озарбайжон) каби кучлилар билан рўбарў келиши кутилмоқда.
